Mihangel Morgan

Morgan, Mihangel

Ganwyd Mihangel Morgan yn Aberdâr yn 1955. Tra bu'n byw yng Ngheredigion bu'n darlithio ar lenyddiaeth Gymraeg yr 20fed ganrif ac ysgrifennu creadigol yn Adran y Gymraeg ym Mhrifysgol Aberystwyth tan yn ddiweddar.

Enillodd Fedal Ryddiaith yr Eisteddfod Genedlaethol gyda'i nofel gyntaf, Dirgel Ddyn (Gomer, 1993), ac o hynny ymlaen prysur datblygodd yn un o awduron cyfoes mwyaf blaengar y Gymraeg. Mae'n un o awduron mwyaf toreithiog, gwreiddiol a phoblogaidd Cymru. Mae wedi cyhoeddi nofelau, cyfrolau o straeon byrion a chyfrolau o gerddi.

Heria'r sefydliad Cymreig yn ei waith ac mae nifer o'i gymeriadau yn bobl ddi-asgwrn cefn yn byw mewn byd anghyflawn. Ceir elfen ôl-fodernaidd i'w ryddiaith, yn yr ystyr Cymreig ac Eingl-Americanaidd.

Mae cyhoeddiadau Mihangel Morgan yn cynnwys:

  • Melog (Gomer, 1997), a gyfieithwyd i’r Saesneg gan y nofelydd a’r bardd Christopher Meredith, a’i gyhoeddi gan wasg Seren yn 2005.
  • Pantglas (Y Lolfa, 2011), a gyrhaeddodd rhestr fer Llyfr y Flwyddyn 2012.
  • Kate Roberts a'r Ystlum a dirgelion eraill (Y Lolfa, 2012).
  • 60 (Y Lolfa, 2017). Detholwyd y casgliad hwn o straeon byrion ar gyfer Silff Lyfrau'r Gyfnewidfa yn 2017.
  • Hen Ieithoedd Diflanedig (Barddas, 2018), sy’n gasgliad o gerddi.
  • Hen Bethau Anghofiedig (Y Lolfa, 2017), sydd ar Silff Lyfrau 2018.

Mae rhestr lawn o’i gyhoeddiadau ar gwales.com.

Llyfrau gan yr un awdur