Datgelu Silff Lyfrau 2024 yn Frankfurt

Rydym wrth ein bodd yn datgelu ein Silff Lyfrau ar gyfer 2024-25, sydd yn cynnwys detholiad bywiog o lenyddiaeth gan awduron o Gymru, a argymhellir gan Gyfnewidfa Lên Cymru i gael sylw rhyngwladol.

Cyhoeddwyd Silff Lyfrau eleni o stondin Cymru yn ystod Ffair Lyfrau Frankfurt, o 15-18 Hydref, mewn cydweithrediad â'n cydweithwyr o Gyngor Llyfrau Cymru a chyhoeddwyr Cymru a gyda chefnogaeth gan Cymru Greadigol, asiantaeth Llywodraeth Cymru sy'n rhoi cymorth i'r diwydiannau creadigol yng Nghymru.

Ffair Lyfrau Frankfurt yw'r man cyfarfod pwysicaf ar gyfer y sector llyfrau byd-eang, nid yn unig ar gyfer hawliau masnachu ond hefyd ar gyfer sicrhau ein bod yn dilyn datblygiadau mwyaf diweddar yn y byd cyhoeddi a'r sîn lenyddol. Gyda dros 2,500 o weithwyr proffesiynol o 130 o wledydd yn mynychu, cawsom gyfnod prysur yn cyfarfod â chyhoeddwyr a phartneriaid prosiect. Buom hefyd yng nghyfarfod cyffredinol blynyddol rhwydwaith ENLIT lle cafodd Alexandra Büchler, cyfarwyddwr Llenyddiaeth ar Draws Ffiniau ei hailethol i'r bwrdd. Cafodd y rhwydwaith, ei sefydlu ar y cyd gydag LAF, yac mae’n dwyn ynghyd 30 o sefydliadau cenedlaethol sy'n ymroddedig i hyrwyddo eu llenyddiaeth a chefnogi cyfieithu llenyddol.

Conglfaen ein presenoldeb mewn ffeiriau llyfrau rhyngwladol yw’r Silff Lyfrau. Mae'n rhoi cyfle unigryw i'n tîm gwrdd â chyhoeddwyr byd-eang, gan hyrwyddo'r gweithiau a'r awduron rhagorol sy'n rhan o'r detholiad hwn. Rydym hefyd yn tynnu sylw at ein Cronfa Grantiau Cyfieithu, sydd ar gael i gyhoeddwyr i gefnogi cyfieithu llenyddiaeth o Gymru i ieithoedd eraill.

Eleni, roeddem yn falch o gyflwyno 34 teitl, casgliad sydd wir yn adlewyrchu amrywiaeth, creadigrwydd, a hyder ysgrifennu cyfoes o Gymru. Mae detholiad Silff Lyfrau 2024-25 yn cynnig cymysgedd cyffrous o genres—ffuglen, ffeithiol, barddoniaeth, a drama.

Mae "Local Fires" gan Joshua Jones yn sefyll allan fel cyfrol ffuglen gyntaf pwerus sy'n archwilio bywydau trigolion Llanelli, gan gyfuno themâu rhywedd, niwrowahaniaeth, a gwrywdod gwenwynig. Cyrhaeddodd y casgliad hwn restr fer Gwobr Dylan Thomas a chyrhaeddodd restr hir Gwobr Llyfr Cyntaf Polari, gan nodi Jones fel ffigwr a llais i’w wylio yn y byd llenyddol. Mae nofel hanesyddol Niall Griffiths, "Of Talons and Teeth,"yn ychwanegiad nodedig arall, sef archwiliad dwys o gariad a chamfanteisio yn y Gymru gyn-ddiwydiannol, sydd wedi ei ganmol am blethu cyfriniaeth gyda’i rhyddiaith cignoeth nodweddiadol.

Yn y categori ffeithiol greadigol, mae cyfrol Richard Gwyn "Ambassaodr of Nowhere: A Latin American Pilgrimage" yn cyfuno cofiant gyda ysgrifennu taith, gan tramwyo De America i chwilio am farddoniaeth a wynebu cythreuliaid personol. Mae cofiant Tiffany Murray, My Family and Other Rock Stars, yn dod â phersbectif unigryw ar dyfu i fyny yn stiwdios chwedlonol Rockfield, safle o hanes cerddoriaeth eiconig. Mae'r ddau yn adlewyrchu amrywiaeth lleisiau a phrofiadau ym maes ysgrifennu Cymraeg heddiw.

Mae’r detholiad o gyfrolau barddoniaeth eleni yn cynnwys "Cowboy" gan Kandace Siobhan Walker, a enillodd wobr Llyfr y Flwyddyn 2024 am Farddoniaeth ac a gyrhaeddodd restr fer Gwobr Forward eleni. Mae'r casgliad bywiog hwn, sydd wedi'i drwytho yn y rhyngrwyd yn ymchwilio i themâu myth teuluol, bywyd modern, a deisyfiad ysbrydol. Enillodd "Mymryn Rhyddid" wobr Llyfr Barddoniaeth y Flwyddyn yn yr iaith Gymraeg i'r awdur aml-genre Gruffudd Owen, a ysgrifennodd "Parti Priodas", ei ddrama ddoniol a theimladwy am berthyn ac unigrwydd, llwyddiant ysgubol yn Eisteddfod Genedlaethol Cymru a ddilynwyd gan daith genedlaethol a werthodd allan. Mae’r ddrama "Woof" gan Elgan Rhys yn cynnig portread agos o berthnasau cwiar, gan gyfuno hiwmor ag eiliadau o densiwn.

Mae nifer o deitlau eraill wedi ennill gwobrau mawreddog. Enillodd "Sut i Ddofi Corryn" Mari George wobr Llyfr y Flwyddyn 2024, gan gynnig stori realaidd hudolus am salwch ac adferiad, mae “Trothwy” gan Iwan Rhys yn stori ffeithiol greadigol deimladwy am ddod yn llystad sy'n neidio rhwng Caernarfon a Berlin ac a bleidleisiwyd yn Ddewis y Bobl ar gyfer Llyfr y Flwyddyn, tra bod "Skrimsli" Nicola Davies, a enillodd Wobr Llyfr y Flwyddyn i Blant a Phobl Ifanc, yn antur ffantasi afaelgar.

Mae'r casgliad hwn yn ymgorffori tirwedd ddeinamig ac amrywiol llenyddiaeth Cymru, ac rydym yn gyffrous i rannu'r straeon hyn gyda'r byd.