Mae ein Cronfa Grantiau Cyfieithu nawr ar agor . Y dyddiad cau ar gyfer y rownd yma yw Mehefin 15fed 2026

Rydym yn cynnal dwy rownd y flwyddyn. Bydd dyddiad cau y rownd nesaf o geisiadau yn cael ei gyhoeddi maes o law.

Mae pob cais yn cael ei asesu gan banel grantiau'r Gyfnewidfa. Mae sampl o waith y cyfieithydd yn cael ei asesu gan ddarllenydd allanol lle bo angen (os nad yw'r Gyfnewidfa yn gyfarwydd â gwaith y cyfieithydd, er enghraifft).

Cefnogir costau’r cyfieithu. Dyfernir ar gyfartaledd tua 50% o’r costau.

Gwnewch gais ar-lein ac anfonwch y dogfennau a restrir i Gyfnewidfa Lên Cymru drwy'r cyfeiriad e-bost canlynol: post@waleslitexchange.org

Mae croeso i chi gysylltu â'r Gyfnewidfa os bydd unrhyw gwestiynau gennych am lenyddiaeth Cymru yn gyffredinol, neu os am drafod eich prosiect cyfieithu. Byddwn yn falch os gallwn fod o gymorth.

Telir y grant i'r cyhoeddwr wedi i'r Gyfnewidfa dderbyn chwe chopi cyfarch o'r cyfieithiad cyhoeddiedig yn ogystal â thystiolaeth fod y cyfieithydd wedi ei dalu yn ôl amodau'r cytundeb. Mae hawl gan y Gyfnewidfa i beidio â thalu'r grant os na chyflawnwyd amodau'r cytundeb.

Caiff y grant cyfieithu ei dalu yn ei grwnswth ar ôl i'r cyhoeddwyr gyflawni'r amodau canlynol:

• Ni ellir dyfarnu grant yn ôl-syllol;
• Rhoddir grantiau at gostau cyfieithu yn unig, nid at gostau cynhyrchu;
• Rhaid cyhoeddi'r canlynol, ynghyd â logo'r Gyfnewidfa, ar un o dudalennau cyntaf pob argraffiad:

  ‘Cyhoeddwyd gyda chefnogaeth grant cyfieithu Cyfnewidfa Lên Cymru, a roddir gan Llywodraeth Cymru drwy Cymru Greadigol ac Arian Loteri Cenedlaethol Cyngor Celfyddydau Cymru.’

• Rhaid argraffu enw'r cyfieithydd yn glir naill ai ar glawr neu ar dudalennau cyntaf y llyfr;
• Rhaid anfon prawf fod y cyfieithydd wedi derbyn tâl yn ôl manylion y cytundeb a ddarparwyd gyda'r cais am grant cyfieithu;
• Rhaid anfon deg copi cyfarch at y Gyfnewidfa.
• Lle bo enwau, geiriau neu ymadroddion Cymraeg yn ymddangos yn y cyfieithiad, cyfrifoldeb y cyhoeddwr yw gwneud yn siwr eu bod wedi eu sillafu yn gywir;
• Cyfrifoldeb y cyhoeddwr yw gwneud yn siwr fod y llyfr wedi ei gynhyrchu a'i ddylunio i safon dderbyniol.
• Rhaid cyhoeddi'r llyfr o fewn 30 mis i ddyddiad dyfarnu'r grant cyfieithu.