Magwyd Angharad Price ym Methel ger Caernarfon. Graddiodd mewn Ieithoedd Modern yng Ngholeg Iesu, Rhydychen lle cwblhaodd hefyd ddoethuriaeth mewn Astudiaethau Celtaidd. Bu'n ddarlithydd ym mhrifysgolion Fienna, Abertawe a Chaerdydd cyn mynd i Brifysgol Bangor lle mae hi bellach yn Athro mewn Cymraeg ac Ysgrifennu Creadigol.
Mae'n awdur nifer o gyfrolau academaidd, cyfrolau o ysgrifau a thair nofel. Enillodd O, Tyn y Gorchudd (Gomer, 2002) y Fedal Ryddiaith yn Eisteddfod Genedlaethol 2002 a gwobr Llyfr y Flwyddyn yn 2003; mae wedi ei chyfieithu i chwech o ieithoedd (Saesneg, Almaeneg, Rwmaneg, Sbaeneg, Bengaleg a Chatalaneg). Cyrhaeddodd y nofel Caersaint (y Lolfa, 2010) restr fer Llyfr y Flwyddyn yn 2011, ac enillodd y gyfrol academaidd, Ffarwél i Freiburg, wobr Ellis Griffith Prifysgol Cymru yn 2013.
Cyfrol ddiweddaraf Angharad yw Ymbapuroli (Gwasg Carreg Gwalch, 2020), casgliad o ddeuddeg o ysgrifau am amrywiol bynciau o Jan Morris i Gapel Bethel ac o Gaergybi i Ngugi wa Thiong'o. Cyrhaeddodd y gyfrol hon restr fer Llyfr y Flwyddyn yn 2021 ac fe'i dewiswyd i'n Silff Lyfrau yn 2021.
Yn 2003, teithiodd i nifer o wyliau llenyddol ar draws Ewrop fel un o'r awduron a ddewiswyd ar gyfer y prosiect Scritture Giovani, ac yn 2014 enwebwyd hi gan Gyfnewidfa Lên Cymru, a’i dethol gan Y Gymdeithas Awduron Ewropeaidd ynghyd â naw o awduron Ewropeaidd i gyfrannu at Restr Finnegan. Mae Angharad yn gyfieithydd profiadol i'r Gymraeg o Almaeneg, Ffrangeg, Eidaleg a Sbaeneg. Yn 2014 dyfarnwyd iddi Fedal Glyndwr am ei chyfraniad i'r celfyddydau yng Nghymru.
Gwyliwch Angharad yn trafod ac yn darllen darn o'i nofel, O! Tyn y Gorchudd, yma.