Cerdyn Post o Latfia

Treuliodd Rhys Trimble mis Rhagfyr ar breswyliad yn Nhŷ Ysgrifennu a Chyfieithu Ventspils ( http://www.ventspilshouse.lv/index_en.php) yn cyfieithu ysgrifenwyr Latfieg. Cafodd y cysylltiad yma rhwng beirdd Latfia a Chymru ei greu o ganlyniad i'r nifer o weithdai cyfieithu barddoniaeth a threfnwyd ar y cyd gan Latvian Literature a Llenyddiaeth ar draws Ffiniau.

Cerdd o Kerala

Bu'r bardd a'r awdur Sian Northey yn cymryd rhan mewn gweithdy cyfieithu yn Kerala, India fis Mawrth. Trefnwyd y gweithdy gan ein chwaer sefydliad, Llenyddiaeth Ar Draws Ffiniau. Darllenwch gerdd newydd a ddaeth i fod drwy'r gweithdy yma.

Yr Ewropead Cyntaf

’Dach chi’n gwbod sut mae hi:
criw fu’n cydweithio,
yn yfad cwrw, byta cyri,
ddiwadd nos,
a gwraig un ohonom yn ffonio.
Mae Raman yn pasio’r ffôn i mi.
Dw i ddim yn ei hadnabod,
wn i ddim ei henw,
ond dw i’n cofio iddo ddweud ei bod hithau’n fardd,
fel yntau.
Ymbalfalwn o bopty’n hacenion
yn yr iaith sy’n clymu’r cyfandiroedd.
‘Titha’n sgwennu?’ meddwn.
‘Rhyw fanion bethau dibwys,’ atebodd,
yn union fel y byddwn innau wedi’i ddweud.
Dychwelais y ffôn i’w gŵr.
Dywedodd Raman rywbeth wrthi:
efallai iddo dyngu cariad hyd dragwyddoldeb,
efallai iddo addo prynu’r iogwrt da wrth basio’r siop.
Yna trodd ataf i.
‘Chdi,’ meddai, ‘yw’r Ewropead cyntaf
iddi siarad ag o erioed.’
Ac am eiliad,
rhwng y platiau budron a’r gwydrau gweigion,
bodolai hanes amgen, lle mae’r cyswllt cyntaf un
oedd dwy wraig,
un, o bosib, braidd yn chwil,
yn bod yn ddiymhongar
am eu cerddi.

Cerdyn Post o Ganada

Fis Hydref teithiodd Siân Northey i ŵyl IFOA (International Festival of Authors) yn Toronto, Canada. Bu Siân yn darllen ei gwaith mewn digwyddiad arbennig dan y teitl ‘Around the World’ ble bu awduron o dri chyfandir a naw gwlad yn trafod eu gwaith. Cefnogwyd ei hymweliad gan y Cyngor Prydeinig yng Nghanada.

Shekon Mari,

Dyma gerdyn o Ganada, gwlad llawn croeso.

1. IFOA Toronto yn trefnu trip i Niagra i’r awduron (a’n llenwi â bwyd a diod!)

2. Cynhadledd Ieithoedd Brodorol sweetgrass yn estyn gwahoddiad i ddarllen cerdd yn y cinio i anrhydeddu ymgyrchwyr ac athrawon iaith (a’n llenwi â bwyd a diod!)

3. Cael aros yng nghartref aelod o lwyth y Mohawk sy’n dysgu Cymraeg (a’n llenwi â bwyd a diod!)

Cofion,

Siân

Detholwyd Rhyd-y-gro gan Sian Northey i Silff Lyfrau 2016, detholiad blynyddol o lyfrau a argymhellir gan y Gyfnewidfa ar gyfer cyfieithu dramor. Darllenwch fwy yma.