Fe fydd gwasg Dalkey Archive Press yn dathlu cyhoeddi’r bumed gyfrol yng nghasgliad Best European Fiction eleni. Cyhoeddir y gyfrol yn flynyddol i gyflwyno gorau llenyddiaeth gyfoes Ewrop i gynulleidfa newydd. Ceir cyfieithiadau o dros 25 o ieithoedd eleni. Ymysg y straeon wedi eu dethol, ac yn cynrychioli llenyddiaeth Cymru, mae ‘Scavenger’ gan Robert Minhinnick.

Mae’r Gyfnewidfa wedi cydweithio â’r wasg a Chyngor Llyfrau Cymru i hyrwyddo gwaith awduron o Gymru ers lansio’r gyfrol bum mlynedd yn ôl. Ymysg rhai o awduron cyfrolau’r gorffennol y mae gwaith gan Penny Simpson (2010), Wiliam Owen Roberts (2011), Duncan Bush (2012) a Ray French (2013).

I ddathlu’r cyhoeddi fe fydd Dalkey Archive Press yn cynnal noson arbennig yng nghwmni Robert Minhinnick, Herkus Kuncius (Lithwania), Oscar Magnusson (Gwlad yr Iâ), Susana Medina (Sbaen), Tonu Onnepalu (Estonia) ynghyd â Drago Jančar (Slofenia), awdur y rhagair, yn Europe House, Llundain ar Ionawr y 15fed, 2014 am 18:30 dan gadeiryddiaeth y newyddiadurwr Rosie Goldsmith.

Dathlu cyhoeddi Best European Fiction 2014, Europe House, Llundain, Ionawr 15fed 2014, 18:30

Gellir darllen mwy am Best European Fiction 2014 yma