Magwyd Iestyn Tyne yn Llŷn ond mae bellach yn byw ac yn gweithio yng Nghaernarfon. Mae’n llenor, yn gerddor, yn gyfieithydd ac yn artist. Mae’n gyd-sylfaenydd a chyd-olygydd cylchgrawn a chyhoeddiadau’r Stamp, tŷ cyhoeddi Cymraeg annibynnol, gwirfoddol a chydweithredol. Mae wedi pefformio ei waith ledled Cymru a thu hwnt, gan gynnwys teithiau yn Ewrop, De America ac Affrica. Enillodd Goron Eisteddfod yr Urdd yn 2016 a’i Chadair yn 2019, ac ef yw’r unig un i fod wedi ennill y ddwy brif wobr lenyddol yn eisteddfodau’r Urdd. Rhwng 2019 a 2023, ef oedd Bardd Preswyl cyntaf yr Eisteddfod Genedlaethol.

Cyrhaeddodd ei gasgliad diweddaraf o farddoniaeth, Stafelloedd Amhenodol (Cyhoeddiadau’r Stamp, 2021) restr fer gwobrau Llyfr y Flwyddyn yn 2022, a chyhoeddwyd trosiad o’r casgliad hwnnw, Unspecified Spaces (Broken Sleep Books, 2023) maes o law. Ei bamffled diweddaraf o gerddi yw Dysgu Nofio (Cyhoeddiadau’r Stamp, 2023) ac yn ei gyhoeddiad diweddaraf, llyfr ffeithiol greadigol Y Cyfan A Fu Rhyngom Ni (Gwasg y Bwthyn, 2025) mae'n cyfuno cofiant, beirniadaeth lenyddol, hanes diwylliannol, ac ysgrifennu creadigol sy'n archwilio bywyd a gwaith y bardd Prosser Rhys a'r cyfnod cyn iddo ennill Coron yr Eisteddfod Genedlaethol yn 1924 gyda'i gerdd ddadleuol "Atgof".

Yn ddiweddar cyhoeddodd Nodiadlyfr bach y wawr sef casgliad o bymtheg cerdd gan Najwan Darwish, un o leisiau barddol cyfoes amlycaf Palesteina, wedi’u dethol a’u cyfieithu o’r Arabeg gan Iestyn a Hammad Rind.

Gyda Leo Drayton, roedd yn awdur Robyn (Y Lolfa, 2021) yng nghyfres Y Pump o nofelau i oedolion ifanc, a chyhoeddwyd addasiad Saesneg gan Mared Roberts o'r casgliad Five gan Firefly yn 2025.

Mae’n gyd-olygydd Welsh [Plural] (Repeater, 2022), y gyfrol o ysgrifau am ddyfodol Cymru.