Cerdyn Post o Farcelona

Mae cyhoeddwyr hefyd yn dwristiaid. Yn y llun ceir cyhoeddwyr cymrodoriaeth Schwob yn tynnu llun o Sagrada Família Gaudí. Cawsom gip o'r eglwys ym mhen draw stryd un gyda'r nos - un ymhlith nifer o bleserau annisgwyl y gymrodoriaeth ym Marcelona fis Mehefin. Trefnwyd ein cymorodoriaeth gan yr Institut Ramon Llull. Yn ein plith yr oedd cyhoeddwyr o Ffrainc, Y Swistir, Yr Eidal, Gwlad Pwyl, Rwmania, Y Ffindir, Yr Iseldiroedd, Twrci a Chymru ac aethpwyd â ni ar daith trwy glasuron modern ein gwledydd unigol yn ogystal â chlasuron Sbaen a Chatalwnia. Aethom adref yn llawn gwybodaeth, wedi cyfarfod gyda chyhoeddwyr, asiantaethau, awduron, cyfieithwyr a llyfrwerthwyr - anodd credu bod 30 siop lyfrau yn ardal Gracia Barcelona yn unig - ac wedi ein hysbrydoli gan y ddinas a'r bywyd llenyddol byw iawn sydd yno. MICK FELTON

Cerdyn post o'r Senedd Fflemaidd

Ym mhob ffeil ar gyfer mynychwyr cyfarfod rhwydwaith Goudfazant yn y Senedd Fflemaidd fis Mai roedd pedwar cerdyn post gyda lluniau gan Ingrid Godon. Dyma Marie & Roos. Darganfyddais bod yr awdur Is-Almaenig, Toon Tellegen, wedi ysgrifennu testunau i gydfynd gyda chyfres o bortreadau ganddi, a bod y rhain wedi eu casglu ynghyd mewn llyfr ar gyfer oedolion a phlant fel ei gilydd. Ar bob tudalen ceir portread ac mae Tellegen yn dychmygu pa feddyliau sy'n gweu trwy feddwl bob un o'r cymeriadau. Cyfieithwyd y gyfrol i'r Ffrangeg a'r Almaeneg. Maurice Lomré bia'r cyfietihiad Ffrangeg, sy'n dwyn y teitl J'aimerais, ac a gyhoeddwyd gan wasg La Joie de Lire yn Genefa, 2013. Y teitl gwreiddiol mewn Is-Almaeneg yw Ik wou (Uitgeverij Lannoo, 2011). Mae'r rhwydwaith Goudfazant yn dwyn ynghyd sefydliadau ariannu cyfieithu ddwy waith y flwyddyn i drafod arfer da.

Cerdyn post o Berlin