Casgliad o straeon/ysgrifau gan 10 awdur sy'n uniaethu fel menywod ac yn byw yng Nghymru yn yr unfed ganrif ar hugain yn sôn am eu profiadau. Mae cyfraniadau'n amrywio o ran genre, arddull ysgrifennu, tôn, hyd, profiad a chefndir: yr unig gyfarwyddyd a roddwyd i'r awduron oedd iddynt ysgrifennu am y profiad o fod yn fenyw yn yr unfed ganrif ar hugain. Ceir cyflwyniad byr gan y golygyddion, Catrin Beard ac Esyllt Lewis, ar ddechrau'r gyfrol.

Mae'r golygyddion wedi casglu ynghyd gynrychiolaeth dda o awduron adnabyddus a phrofiadol sydd eisoes yn gyfarwydd, a mwy o awduron 'newydd' ac felly wedi cyflawni un o brif nodau'r gyfrol, ac yn wir un o brif amcanion Gwasg Honno, sef meithrin a darparu llwyfan i awduron newydd.

Cyfranwyr : Megan Davies, Megan Hunter, Mabli Siriol Jones, Non Mererid Jones, Nia Morais, Grug Muse, Siân Northey, Rebecca Thomas, Miriam Sautin, Manon Steffan Ros.

Golygyddion : Catrin Beard ac Esyllt Angharad Lewis

Artist : Seren Morgan Jones